“JASLAR – JASIL RAWAJLANIW HÁM EKOLOGIYALIQ BASLAMALAR KÚSHI” TEMASINDA.
JASLAR HÁM HAYAL-QIZLAR MENEN ASHIQ SÓYLESIW ÓTKERILDI
🍀Qaraqalpaqstan awıl xojalıǵı hám agrotexnologiyalar institutında jaslar hám hayal-qızlar menen ashıqtan-ashıq sóylesiw maqsetinde seminar shólkemlestirildi.“JASLAR – JASIL RAWAJLANIW HÁM EKOLOGIYALIQ BASLAMALAR KÚSHI” atamasında ótkerilgen bul ilajdıń tiykarǵı maqseti student-jaslar arasında ekologiyalıq mádeniyattı arttırıw, qorshaǵan ortalıqtı qorǵawǵa bolǵan juwapkershilikti kúsheytiw hám jaslardıń ekologiyalıq baslamaların qollap-quwatlawdan ibarat boldı.
Seminardı instituttıń Jaslar máseleleri hám ruwxıy-aǵartıwshılıq isleri boyınsha birinshi prorektorı M.Dauletmuratov ashıp berip, ilajdıń áhmiyeti haqqında aytıp ótti hám de kelgen miymanlardı student-jaslarǵa tanıstırdı. Ol óziniń shıǵıp sóylegen sózinde ekologiyalıq mashqalalardı saplastırıwda jaslardıń belsendiligi, intakerligi hám innovaciyalıq ideyaları áhmiyetli orın iyeleytuǵının ayrıqsha atap ótti.
Bunnan soń Begimova Aysanem Polatovna – Ózbekstan Ekologiyalıq partiyası Qaraqalpaqstan Respublikası partiya shólkemi Keńesi Atqarıw komitetiniń baslıǵı shıǵıp sóylep, mámleketimizde ekologiyalıq turaqlılıqtı támiyinlew, jasıl aymaqlardı keńeytiw, qorshaǵan ortalıqtı saqlaw hám xalıqtıń ekologiyalıq mádeniyatın arttırıw baǵdarında ámelge asırılıp atırǵan reformalar haqqında tolıq maǵlıwmat berdi. Ol ekologiyalıq tazalıq hám taza ortalıqtı saqlaw hár bir puqaranıń minneti ekenin atap ótip, jaslardı tábiyatqa mehir menen qarawǵa, ekologiyalıq joybarlar hám kewilliler háreketlerinde belsene qatnasıwǵa shaqırdı.
Ilaj dawamında Matkarimova Nilufar Boqijonovna – Ózbekstan Ekologiyalıq partiyası Oraylıq Keńesi Atqarıw komiteti Jaslar hám hayal-qızlar máseleleri boyınsha orınbasarı “Jaslar – jasıl rawajlanıw hám ekologiyalıq baslamalar kúshi” atamasında mazmunlı bayanat penen qatnastı. Ol prezentaciya hám slaydlar arqalı global ekologiyalıq mashqalalar, klimat ózgeriwi, suw hám jer resurslarınan aqılǵa uǵras paydalanıw, shıǵındılardı saylap alıw mádeniyatı hám “jasıl ekonomika” principleriniń áhmiyeti haqqında hár tárepleme túsinikler berdi. Sonday-aq, ekologiyalıq mashqalalardı sheshiwde jaslardıń baslamaları hám innovaciyalıq ideyaları áhmiyetli kúsh ekenin atap ótip, studentlerdiń qızıqtırǵan sorawlarına juwap berdi.
◾️Ashıqtan-ashıq sóylesiw qızǵın hám qızǵın ruwxta bolıp ótti, onda student-jaslar ekologiyalıq qorǵaw, jasıl texnologiyalardı engiziw hám ekologiyalıq joybarlardı ámelge asırıw boyınsha óz pikir-usınısların bildirdi.
Ilaj sońında instituttıń jámiyetlik jumıslarında belsene qatnasıp, ekologiyalıq úgit-násiyatlaw hám baslamalarda úlgi kórsetken 5 belsendi jaslar húrmet jarlıqları menen sıylıqlandı. Bul tán alıw olardıń keleshektegi jumısına jáne de úlken xoshamet bolıp xızmet etetuǵını atap ótildi.
Sonday-aq, institut janındaǵı partiyanıń “Ekologiya hám salamatlıq” hayal-qızlar klubınıń jumısın jáne de rawajlandırıw maqsetinde klub baslıǵı saylandı hám saylanǵan talabanǵa isenim jarlıǵı saltanatlı túrde tapsırıldı. Bul klub hayal-qızlar arasında salamat turmıs tárizin hám ekologiyalıq mádeniyattı úgit-násiyatlawǵa xızmet etedi. Bunnan tısqarı, institut janındaǵı partiyanıń “Jaslar qanatı” jámiyetiniń baslıǵı da saylanıp, oǵan isenim jarlıǵı tapsırıldı. Jańa basshı jaslardıń ekologiyalıq baslamaların qollap-quwatlaw, olardı jámiyetlik jumıslarǵa keńnen tartıw hám ekologiyalıq joybarlardı ámelge asırıwda belsene qatnasatuǵını atap ótildi.
Ilaj juwmaǵında ekologiyalıq mashqalalarǵa biypárwa bolmaw, tábiyattı saqlaw hám keleshek áwladlarǵa taza qorshaǵan ortalıqtı qaldırıp ketiw bárshemizdiń ulıwma juwapkershiligimiz ekeni ayrıqsha atap ótildi. Seminar qatnasıwshılarda ekologiyalıq sana-sezim hám juwapkershilikti jáne de bekkemlew, jaslardıń jasıl rawajlanıw jolındaǵı baslamaların qollap-quwatlawǵa xızmet etken áhmiyetli qarım-qatnas maydanına aylandı.
