Урмия университети менен меморандумға қол қойылды

Urmiya universiteti menen memorandumǵa qol qoyıldı

Sońǵı  jılları elimide joqarı bilimlendiriw tarawında da sırt ellerdiń abıroylı joqarı oqıw orınları menen birge islesiw, ilimiy baylanıslar alıp barıw hám qospa fakul`tetler ashıw boyınsha bir qansha unamlı jumıslar ámelge asırılmaqta.

Atap aytqanda Ullıbritaniya, Yaponiya, Qıtay, Rossiya, Pol`sha, Latviya, V`etnam, Iran, Belarus`, Qazaqstan, Ázerbayjan, Tájikstan, Qırǵız Respublikalarınıń joqarı oqıw orınları hám Germaniyanıń bir qatar xalıqaralıq shólkemleri menen birge islesip kiyatırǵan Tashkent mámleketlik agrar universiteti Nókis filialı jámááti de Aziyanıń jáne bir abıraylı oqıw orınlarınıń biri bolǵan Urmiya universitetiniń basshıları menen de óz-ara onlayn ushırasıw ótkerdi.

Oǵan Ózbekstan Respublikasınıń Iran Islam Respublikasındaǵı elshixanası, Qaraqalpaqstan Respublikası Investiciyalar hám sırtqı sawda ministrligi wákillleri, TashMAU Nókis filialınıń basshıları hám professor-oqıtıwshıları qatnastı.

Ushırasıwda Urmiya universiteti rektorı Raxim Xobbenagi hám usı universitet janındaǵı Artemiya hám akvamádeniyat ilimiy-izertlew institutı direktorı, professor Naser Ag, Ózbekstan Respublikasınıń Iran Islam Respublikasındaǵı ayrıqsha hám tolıq huqıqlı elshisi B.Abdullaev, Qaraqalpaqstan Respublikası Investiciyalar hám sırtqı sawda ministriniń orınbasarı A.Kamalovlar shıǵıp sóylep, bul ushırasıwdıń maqseti hám alda turǵan wazıypalar haqqında ilaj qatnasıwshılarına aytıp ótti.

Ilajda TashMAU Nókis filialı direktorı, professor E.Tóreniyazov shıǵıp sóylep, filialdıń búgingi turmısı, onda studentler hám professor-oqıtıwshılar ushın jaratılǵan sharayatlar, filialdıń aldında turǵan áhmiyetli wazıypalar haqqında iranlı kásipleslerine keń túrde túsinikler berdi.

Sonday-aq, ushırasıwda Irannıń Batıs Azerbayjan provinciyasınıń óndiris hám sawda-satıq máseleleri boyınsha Bas direktorı Gulammırza Babash shıǵıp sóylep, Qaraqalpaqstanǵa Irannan investorlardı alıp keliw boyınsha óziniń aldaǵı is-rejeleri tuwralı aytıp ótti.

Ushırasıw sońında TashMAU Nókis filialı hám Urmiya universiteti arasında óz-ara birge islesiw boyınsha memorandumǵa qol qoyılıp, keleshektegi is-rejeler belgilep alındı.