Mámleketlik komissiyasınıń protokolına muwapıq, 2025-2026-oqıw jılı ushın kiriw imtixanları nátiyjelerine bola 56,7 hám onnan joqarı ball toplaǵan, biraq studentlikke usınıs etilmegen abiturientlerdi bakalavriat tálim baǵdarlarına qosımsha qabıllawda eselengen tólemli kontrakt muǵdarın rektor (direktor) tárepinen erkin belgilew tómendegi tártipte ámeliyatqa engiziledi:

Qabıllaw shegaralarına 4,05 ballǵa shekem jetpegen abiturientler ushın belgilengen eselengen tólemli kontrakt muǵdarları Ministrler Kabinetiniń 2025-jıl 13-sentyabrdegi 578-sanlı qararı menen tastıyıqlanǵan Reje talapları (1-qosımsha 73-bánt) tiykarında belgilenedi;

Qabıllaw shegaralarına 4,05 balldan artıq ball jetpegen abiturientler ushın eselengen tólemli kontrakt muǵdarları joqarı oqıw orınlarınıń rektorları (direktorları) tárepinen bazalıq tólemli kontrakttiń 3,0 esesinen kem bolmaǵan muǵdarda belgilenedi.

 Barlıq joqarı oqıw orınları tárepinen 2025-jıl 25-sentyabrge shekem 2025-2026-oqıw jılı ushın bakalavriat tálim baǵdarları hám oqıtıw formaları kesiminde eselengen tólemli kontrakttiń minimal muǵdarları tastıyıqlanadı hám rásmiy veb-saytında járiyalanadı.

 2025-2026-oqıw jılı qabıllawında eselengen tólemli kontrakt tiykarında oqıw niyetin bildirgen abiturientlerge bir jıllıq oqıtıw bahasınıń 50 procentin 2025-jıldıń 31-oktyabr kúnine shekem (sol kúni de) tólewge ruxsat beriledi.

 Sonday-aq, bakalavriat tálim baǵdarlarına kiriw imtixanları nátiyjesi boyınsha tańlawda qatnasıp, ekinshi-besinshi bakalavriat tálim baǵdarlarınıń biri boyınsha mámleketlik grant yamasa tólemli kontrakt tiykarında studentlikke usınıs etilgen abiturientlerge óz qálewine bola ústemligi boyınsha saylaǵan birinshi bakalavriat tálim baǵdarında eselengen tólemli kontrakt tiykarında oqıwǵa ruxsat berildi (maqsetli qabıllaw tiykarında studentlikke usınıs etilgenler buǵan kirmeydi).