2025-jıl 23-oktyabr kúni Nókis qalasındaǵı “1-sanlı Sport mektebi” kompleksinde “Keleshekke qádem” baǵdarlaması sheńberinde Qaraqalpaqstan Respublikası joqarı oqıw orınları pitkeriwshileri ushın “TalabaExpo-2025” kásiplik kórgizbesi bolıp ótti.

 Ilajda Qaraqalpaqstan Respublikası Joqarı bilimlendiriw, ilim hám innovaciyalar ministri A.Ayapov, Qaraqalpaqstan awıl xojalıǵı hám agrotexnologiyalar institutınıń birinshi prorektorı M.Dáwletmuratov, oqıw isleri boyınsha prorektor N.Absattarov, “Keleshekke qadem” dástúrin muwapıqlastırıwshı “Registrator ofis” bólimi studentlerge xızmet kórsetiw menedjeri G. Pirniyazova, fakultet dekanları, jaslar jetekshileri hám “Ózmilliybank” AJ, “Keleshekke qádem” orayı, bank-finans shólkemleri hám jeke menshik sektor wákilleri qatnastı.

 Kórgizbeniń tiykarǵı maqseti pitkeriwshi studentlerdiń bántligin támiyinlew, olardı miynet bazarına tayarlaw, sonday-aq, jas isbilermenlerdiń startap ideyaların qollap-quwatlawdan ibarat boldı. Ilaj dawamında 80 nen aslam kárxana hám shólkemler tárepinen 700 den aslam bos jumıs orınları usınıldı. Pitkeriwshi studentler óz qánigeliklerine sáykes bolǵan bos jumıs orınları menen tanısıp, ámeliyat hám stajirovka baǵdarlamalarında qatnasıw imkaniyatına iye boldı.

 Sonday-aq, ilaj sheńberinde seminar-treningler shólkemlestirilip, onda tájiriybeli isbilermenler – “Kaypanov Development Group” JShJ baslıǵı A.Kaypanov, “Cake Bumer Pastry” kárxanasınıń tiykarın salıwshısı M.Mamutova, “Essima Academy & Cosmetology” JShJ basshısı S.Asanova hám “Biogumus” JShJ basshısı Sh. Niyazimbetov óziniń tabıs jolları, jumıs tájiriybeleri hám biznestegi tabıs sırların jaslar menen bólisti.

 “Ózmilliybank” AJ hám “Keleshekke qádem” orayınıń wákilleri tárepinen studentlerge Prezidenttiń 2025-jıl 14-fevraldaǵı PQ-61-sanlı qararı tiykarında berilip atırǵan jeńilletilgen kreditler hám finanslıq sawatlılıq máseleleri boyınsha tolıq túsinik berildi. Bul baǵdarlama jaslardıń startap joybarların ámeliyatqa engiziw hám óz biznesin jolǵa qoyıwda áhmiyetli imkaniyat jaratıp bermekte.

 Ilaj sońında instituttıń qábiletli studentleri ózleriniń biznes joybarların usınıp, Qaraqalpaqstan Respublikası Joqarı bilimlendiriw, ilim hám innovaciyalar ministri A.Ayapov tárepinen “Alǵısnama” menen sıylıqlandı.

 Alǵısnama menen sıylıqlanǵan studentler dizimi:

 Shinibaev Tursunbay Sultanovich – Agronomiya, 3-kurs.

 Karimullaev Jumabek Nuratdin ulı – Awıl xojalıǵı mexanizaciyası

 Kenesbaeva Biybisanem Sharapat qızı – Balıqshılıq, 4-kurs

 Kadrimbetova Tumaris Sabidovna – Yurisprudenciya, 4-kurs

 Xudoyan Oksana Askarovna – Íssıxana xojalıǵı, 4-kurs.

 Qayıpbergenov Alimbek Kuatbaevich – Agronomiya, 4-kurs

 Bekbergenova Aygul Uzaqbaevna – Ekologiya, 3-kurs

 Ibrayımova Umida Alimbay qızı – Kadastr, 2-kurs

 Joldasbaeva Hurliman Salamat qızı – Balıqshılıq, 1-kurs

 Saburova Shaxnoza Madiyar qızı – Xabar sistemaları hám texnologiyaları

 Bul kórgizbe pitkeriwshi studentlerge ámeliy tájiriybe arttırıw, miynet bazarında óz ornın tabıw hám keleshektegi tabıslı jumısı ushın bekkem tiykar jarattı.