☄️Pitkeriwshi studentler ushın akademiyalıq halallıq boyınsha seminar-trening
Usı jıldıń 8-oktyabr kúni Qaraqalpaqstan awıl xojalıǵı hám agrotexnologiyalar institutında pitkeriwshi kurs studentleri ushın «Avtorlıq huqıqı, plagiat hám akademiyalıq halallıq» temasında seminar-treningler ótkerildi. Ilajdı institut Magistratura bólimi baslıǵı N.A.Absattarov hám Registrator ofis baslıǵı D.B.Ramazanov alıp bardı.
Dáslep, Magistratura bólimi baslıǵı N.A.Absattarov avtorlıq huqıqınıń huqıqıy tiykarları, ilimiy jumıstı orınlawda basqa avtorlardıń miynetlerinen paydalanıw tártibi hám citata keltiriw qaǵıydaları haqqında toqtalıp ótti. Ol studentlerdiń itibarın ilimiy miynetti payda etiwshi hár bir avtordıń huqıqı nızam menen qorǵalatuǵınına qarattı.
Onnan soń, Registrator ofis baslıǵı D.B.Ramazanov bolsa pitkeriw qánigelik jumısların antiplagiat sistemasında tekseriwden ótkeriw tártibi, haqıyqıylıq (originallıq) dárejesine qoyılatuǵın talaplar hám tekseriw nátiyjeleri boyınsha júzege keletuǵın juwapkershilik máselelerine toqtalıp ótti. Sonday-aq, ol studentlerge ádebiyatlar dizimin durıs rásmiylestiriw hám paydalanılǵan derekti kórsetiw boyınsha ámeliy másláhátler berdi.
Seminar dawamında akademiyalıq halallıq tek talap emes, al ilimiy jumıstıń sapasın hám avtordıń abıroyın belgileytuǵın tiykarǵı principlerden biri ekeni atap ótildi. Pitkeriwshi studentler óz jumısların tayarlaw barısında ushırasatuǵın sorawlar boyınsha juwaplar aldı.
