Seminar-trening 13-14-iyun kúnleri bolıp ótiwi rejelestirilgen bolıp, búgin seminardıń ashılıw máresimi hámde klimat ózgeriwin jumsartıw hám Aralboyı aymaqlarınıń ekologiyalıq turaqlılıǵın tiklewge qaratılǵan ilimiy izertlewler haqqında seminar qatnasıwshıları óz bayanatların jıynalǵanlar hám ǵalaba xabar quralları wákillerine bayan etti.

 Búgingi seminardı Qaraqalpaqstan Respublikası Joqarǵı Keńesi baslıǵınıń orınbasarı R.Saparbaev ashıp berdi. Bunnan soń Ózbekstan Respublikası Awıl xojalıǵı ministriniń orınbasarı Alisher Shukurov, Jáhán bankiniń awıl xojalıǵı boyınsha úlken ekonomisti Dr. Pierre Gerber, Awıl xojalıǵında bilim hám innovaciyalar milliy orayınıń direktorı prof. Shadman Námazov, Tashkent mámleketlik agrar universiteti rektorı prof. Narzulla Oblomuradov, Marc Van Uytvanck, EU-ASK Facility, Awıl xojalıǵı ministrligi, Qaraqalpaqstan awıl xojalıǵı hám agrotexnologiyalar institutı rektorı Berdiyar Jollibekov sózge shıǵıp, seminardıń áhmiyeti, búgingi kúnde ámelge asırılıwı kerek bolǵan is-ilajlar haqqında toqtap ótti.

 Bul seminar arqalı búgingi kúndegi klimat ózgeriwi tek ǵana awıl xojalıǵına emes, balki, bazar ekonomikasına, sol aymaqta jasap atırǵan insanlardıń salamatlıǵına, topıraq, ıqlım ózgeriwi arqalı aymaqtıń ekologiyasına da úlken tásir etetuǵını ayrıqsha atap ótildi.

 Seminar májilisiniń ashılıw máresiminen soń klimat ózgeriwin jumsartıw hám Aralboyı regionında ekologiyalıq turaqlılıqtı tiklew boyınsha ilimiy izertlew institutları, xalıqaralıq shólkemlerdiń wákilleri búgingi kúndegi alıp barılıp atırǵan izertlewlerge súyengen halda alıp barılıp atırǵan ilimiy jumıslar haqqında qatnasıwshılarǵa óz bayanatların inam etti.