2025-jıl 22-sentyabr kúni Tashkent qalasında Innovaciyalıq rawajlanıw agentligi hám Yaponiya xalıqaralıq birge islesiw agentligi (JICA) menen birgelikte ámelge asırılıp atırǵan bahası 5,0 million AQSh dolları bolǵan SATREPS-2020 baǵdarlaması sheńberinde birgeliktegi muwapıqlastırıwshı komitettiń 4-májilisi bolıp ótti.

 Bul joybar “Aralboyı regionında topıraqtıń shorlanıwına qarsı gúresiw, jerdiń ónimdarlıǵın hám azıq-awqat qáwipsizligin arttırıw ushın suw resurslarınan paydalanıwdı monitoring etiw hám qadaǵalawdıń jańa texnologiyaların islep shıǵıw”ǵa qaratılǵan bolıp, onıń tiykarǵı maqseti jerlerdiń ónimdarlıǵın arttırıw, suwdan paydalanıw imkaniyatı sheklengen aymaqlarda jasaytuǵın xalıqtıń abadanlıǵın táminlew hám awıl xojalıǵına jańa yapon texnologiyaların engiziwden ibarat.

 Ushırasıwda Yaponiyalı hám Ózbekstanlı ilimpazlar jáne joybar qatnasıwshıları tárepinen 2024-2025-jıllarda ámelge asırılǵan jumıslardıń nátiyjeleri tanıstırıldı. Sonday-aq, joybardıń keleshektegi rejelerine baylanıslı sóylesiwler alıp barılıp, 2026-jılı orınlanıwı rejelestirilgen ilimiy izlenisler dodalandı.

 Bul májiliste Qaraqalpaqstan awıl xojalıǵı hám agrotexnologiyalar institutı rektorı B.Jollıbekov ta qatnastı. Ol óziniń shıǵıp sóylewinde 2020-2025-jıllarda joybar sheńberinde Qaraózek rayonlarında alıp barılǵan ilimiy izleniwlerdiń nátiyjeleri haqqında maǵlıwmat berip, regionda azıq-awqat qáwipsizligin támiyinlewdegi mashqalalardı sheshiwde bunday xalıqaralıq joybarlardıń áhmiyeti oǵada joqarı ekenin atap ótti.