Seminarda dástúr imkaniyatları, bántlik máseleleri hám biznes joybarlardı qollap-quwatlaw mexanizmleri boyınsha qısqasha maǵlıwmatlar berildi. Bul boyınsha Ózmilliy bank Akcionerlik jámiyeti Qaraqalpaqstan Respublikası filialı “Keleshekke qádem” sektorı Oray menejeri K.Sharipova dástúr sheńberinde berilip atırǵan imkaniyatlar, biznes joybarlardı qarjılandırıw tártibi, kredit shártleri hám zárúr hújjetler boyınsha maǵlıwmat berdi. Sonday-aq, biznes ideyalardı tayar joybar dárejesine jetkeriw basqıshları haqqında túsindirip ótti.

 Sawda-sanaat palatası Qaraqalpaqstan Respublikası basqarmasınıń bas qánigesi J.Berdimuratov pitkeriwshi studentlerdiń bántligi, miynet bazarına tayarlanıwı hám olarǵa kórsetilip atırǵan járdem haqqında aytıp ótti.

 Seminardıń tiykarǵı miymanlarınan biri Isbilermen Joqarǵı Keńes deputatı hám “Biogomus” fermer xojalıǵınıń baslıǵı Sh.Niyazımbetov studentlerge óziniń isbilermenlik jolı, ushırasqan qıyınshılıqları hám tabısqa erisiw tájiriybeleri haqqında aytıp berdi. Ol pomidordı qayta islew hám tábiyǵıy qaq tayarlap Evropa mámleketlerine eksport etiw boyınsha erisilgen nátiyjeler menen bólisip, jaslardı sabırlılıq penen maqsetlerine erisiwine shaqırdı.

 Seminar dawamında studentler ózlerin qızıqtırǵan sorawlar menen múrájat etip, qánigeler tárepinen ámeliy juwaplar aldı. Ilaj pitkeriwshi studentlerde isbilermenlik kónlikpelerin qáliplestiriw hám olardı miynet bazarına tayarlawda ayrıqsha áhmiyetke iye boldı.