Sırt el universitetleriniń professor-oqıtıwshıları qatnasıwında ushırasıw bolıp ótti
Qaraqalpaqstan awıl xojalıǵı hám agrotexnologiyalar institutına 2026-jıl 28-aprel kúni YAponiya mámleketinen Tokio awıl xojalıǵı hám texnologiyalar universitetinen Yashiko KAWABATA, Chowa farmacevtika universitetinen Takahisa NAKANE hám Isoda Susumu, Kochi prefekturası Makino botanika baǵınan Akihito Takano hám Hori Kiyotakalar kelip, professor-oqıtıwshılardıń qatnasıwında áhmietli ushırasıw bolıp ótti. Usı sapar sheńberinde Awıl xojalıǵı ónimlerin saqlaw, dárilik ósimliklerdi jetistiriw hám qayta islew texnologiyası baǵdarındaǵı kafedra menen birgelikte arnawlı master-klass shólkemlestirildi. Master-klass dawamında yaponiyalı qánigeler dárilik ósimlikler yaǵnıy efedra ósimligin jetistiriwdi, olardı ilimiy tiykarda úyreniw, zamanagóy texnologiyalar tiykarında qayta islew hám tarawda qollanıw boyınsha óz tájiriybeleri menen ortaqlastı.
Bul sapar eki hápte dawam etedi hám onda óz-ara birgelikte ilimiy-izertlew maydanlarına barıw, laboratoriyalıq tájiriybelerdi ámelge asırıw, student hám izertlewshilerge lekciya hám ámeliy sabaqlar alıp barıw jumısları ámelge asırıladı.
Ilaj dawamında studentler hám jas izertlewshiler ózlerin qızıqtırǵan sorawlarǵa tolıq juwaplar aldı, ámeliy hám teoriyalıq bilimlerin jáne de bayıtıw imkaniyatına ie boldı. Sonday-aq, ushırasıw procesinde eki tárepleme birge islesiwdi rawajlandırıw máseleleri, atap aytqanda, studentler almasıw baǵdarlamaları, qospa ilimiy izertlewler alıp barıw hám keleshekte birgeliktegi joybarlardı shólkemlestiriw máseleleri de dodalandı.
Bul ushırasıw institutımız ushın xalıqaralıq baylanıslardı bekkemlew, studentlerdiń bilim hám kónlikpelerin arttırıw jáne ilimiy potencialdı rawajlandırıw jolındaǵı áhmietli qádemlerden biri boldı.
