Qaraqalpaqstan awıl xojalıǵı hám agrotexnologiyalar institutında Yaponiyanıń CHIBA universiteti Vica Prezidenti Dr. Michiko Takagaki hám Topıraq ilimleri laboratoriyası professorı, a-x.i.d. Miwa Yashima xızmet saparında boldı. Miymanlardı institut rektorı Berdiyar Jollibekov kútip aldı. Ushırasıwda, Berdiyar Jollibekov institut haqqında tolıq maǵlıwmat berip, jańadan ashılıp atırǵan laboratoriyalar, alıp barılıp atırılǵan ilim-izertlew jumıslarınıń barısı, shet ellerdegi joqarı oqıw orınları menen baylanıslar, sonday-aq, Chiba universiteti menen ámelge asırılǵan jumıslar hám keleshektegi rejeler menen bólisti. CHIBA universiteti Vica Prezidenti Dr. Michiko Takagaki universiteti haqqında maǵlıwmat bere otırıp, Chiba universiteti dúnya júzlik reytingte TOP-300 universitettiń qatarında ekenligi, dúnya júzinen 18 mámleketten 1200 den aslam sırt el studentleri bilim alıp atırǵanlıǵı, Qaraqalpaqstan awıl xojalıǵı hám agrotexnologiyalar institutı menen birge islesiwden quwanıshta ekenligin bildirdi. Bunnan soń, 2016-jılda dúzilgen birge islesiw shártnamasın jańadan dúziw boyınsha pikirler alısıldı hám jańa shártnamalarǵa qol qoyıldı.

    Jańadan dúzilgen shártnamaǵa muwapıq, Qaraqalpaqstan awıl xojalıǵı hám agrotexnologiyalar institutına student almasıw programması boyınsha Chiba universitetiniń jáne bir studenti 6 ayǵa oqıwǵa keldi. Sonıń menen birge, usı jıldıń oktyabr ayında Qaraqalpaqstan awıl xojalıǵı hám agrotexnologiyalar institutınan 2 magistrant Chiba universitetine oqıwǵa baratuǵınlıǵı ayrıqsha atap ótildi.
     Maǵlıwmat ushın, Qaraqalpaqstan awıl xojalıǵı hám agrotexnologiyalar institutında shet tillerin rawajlandırıw hám studentlerde hám professor-oqıtıwshılarda til biliw sertifikatların kóbeytiw, sonday-aq, sırt el grantların jeńip alıwshılar sanın kóbeytiw yapon, anglichan hám rus tillerinen studentler hám professor-oqıtıwshılar ushın tayarlıq kursları shólkemlestirilgen.