2025-jıl 24-iyun kúni Qaraqalpaqstan awıl xojalıǵı hám agrotexnologiyalar institutında Qaraqalpaqstan Respublikası Ósimlikler karantini hám qorǵaw agentligi hám Germaniyanıń xalıqaralıq birge islesiw jámiyeti (GIZ) menen birgelikte “Ekosertifikatqa iye bolıw dúnya bazarına jol ashadı” temasında seminar-trening shólkemlestirildi.

 Seminar-treningte organikalıq awıl xojalıǵı ónimlerin islep shıǵarıwshı klasterler, fermer xojalıqları hám qıytaq jer iyeleri, institut professor-oqıtıwshıları, sonday-aq, juwapker qánigeler qatnastı.

 Ilajdıń tiykarǵı maqseti, ekosertifikatqa iye bolıwdıń áhmiyetliligi hám organikalıq ónimlerdi jetistiriw procesindegi ámeliyatlardı durıs jolǵa qoyıw boyınsha bilim hám tájiriybe almasıw. Seminar dawamında ekologiyalıq taza ónimlerdi islep shıǵarıwdıń artıqmashılıqları, organikalıq sertifikatlastırıw sistemaları hám dúnya bazarına shıǵıw ushın zárúr bolǵan sertifikatlastırıw procesleri haqqında keń maǵlıwmat berildi.

 Germaniyanıń xalıqaralıq birge islesiw jámiyeti (GIZ) wákilleri tárepinen usınılǵan maǵlıwmatlarǵa kóre, ekologiyalıq awıl xojalıǵı sertifikaciyası jáhan bazarında ónimlerdiń básekige shıdamlılıǵın arttırıwǵa járdem beredi. Bunıń nátiyjesinde, fermerler tek ǵana ishki bazarda emes, al Evropa, Aziya hám basqa da regionlarda da óz ónimlerin tabıslı satıw imkaniyatına iye boladı.