Qaraqalpaqstan awıl xojalıǵı hám agrotexnologiyalar institutı qabıllaw komissiyası tárepinen 2025/2026-oqıw jılı ushın texnikumlardı ayrıqsha bahalar menen tamamlaǵan pitkeriwshilerdi institutımızdıń bakalavriat tálim baǵdarlarına oqıwǵa qabıllaw maqsetinde sáwbetlesiw ótkeriw baslandı.

 Sawbetten ótkeriw kestesine muwapıq, búgin, 21-avgust kúni, Málimleme-resurs orayınıń májlisler zalında texnikum pitkeriwshilerin bakalavriattıń kúndizgi, keshki hám aralıqtan oqıtıw tálim baǵdarlarına sáwbet arqalı qabıllaw processleri bolıp ótpekte. Onda tiyisli mákeme hám shólkemlerden wákiller, qabıllaw komissiyası aǵzaları, professor-oqıtıwshılar qatnaspaqta.

 Sáwbetlesiw procesinde pitkeriwshilerdiń tańlaǵan tálim baǵdarı boyınsha tayarlıq dárejesi, kásiplik bilim hám kónlikpeleri bahalanbaqta. Hár bir talaban menen óz aldına sóylesip, olardıń bilim dárejesi hám tańlaǵan tarawına bolǵan qızıǵıwshılıǵı anıqlanbaqta.

 Bul process instituttıń ashıq-aydınlıq principleri tiykarında shólkemlestirilgen bolıp, onda barlıq talabanlar ushın teń sharayatlar jaratılǵan. Usı arqalı texnikumlardı tabıslı tamamlaǵan jaslar ózleriniń akademiyalıq jolın joqarı bilimlendiriwde dawam ettiriw imkaniyatına iye boladı.