Búgin, 2025-jıl 14-sentyabr kúni, Aziya Rawajlanıw Bankiniń (ADB) Qubla, Oraylıq hám Batıs Aziya boyınsha vice-prezidenti mırza Yingming Yang hám de ADB wákilleri – Oraylıq hám Batıs Aziya departamenti bas direktorı Leah Gutierrez, Insan hám sociallıq rawajlanıw boyınsha úlken sektor direktorı Ayako Inagaki hám ADBnıń Ózbekstandaǵı wákilxanasınıń direktorı Kanokpan Lao-Araya xızmet saparı menen Qaraqalpaqstan Respublikasına keldi.

 Xızmet saparı sheńberinde miymanlar Nókis rayonında jaylasqan Dán hám salı ilimiy óndirislik birlespesiniń tájiriybe maydanında ótkerilgen ilajda qatnastı. Ilajda birlespeniń iskerligi hám erisilgen nátiyjeleri haqqında tolıq maǵlıwmat berildi.

 Sonday-aq, ilajda fermerler hám awıl xojalıǵınıń rawajlanıwına úles qosıp kiyatırǵan ilimpazlar menen qızǵın pikirlesiw bolıp ótti. Sáwbetlesiw dawamında tárepler birge islesiwdi jáne de bekkemlew, jańa joybarlardı ámelge asırıw hám awıl xojalıǵı tarawında innovaciyalıq kózqaraslardı engiziw máseleleri dodalandı.

 Aziya rawajlanıw banki wákilleriniń Qaraqalpaqstanǵa saparı elimizde ámelge asırılıp atırǵan reformalar hám awıl xojalıǵı sektorın turaqlı rawajlandırıw jolındaǵı xalıqaralıq birge islesiwdi kúsheytiwge xızmet etetuǵını menen áhmiyetli.