1999-jılı BMSh Assambleyası tárepinen 25-noyabr rásmiy túrde Hayal-qızlarǵa qarata zorlıqtı saplastırıw xalıqaralıq kúni, 1950-jılı bolsa 10-dekabr Insan huqıqları kúni sıpatında járiyalandı.

 Hár jılı 25-noyabrden 10-dekabrge shekem, yaǵnıy Insan huqıqları kúnine shekemgi múddette dúnya júzi kóleminde belgili bir tema sheńberinde “Gender tiykarındaǵı zorlıqqa qarsı 16 kúnlik belsendilik” global kampaniyası ótkerilip kelinbekte.

 BMSh tárepinen bıyılǵı jılǵı kampaniya “Hayal-qızlarǵa qarsı sanlı zorlıqqa shek qoyıw ushın birleseyik” temasında shólkemlestiriletuǵını belgilengen.

 Házirgi sanlı dáwirde internet hám sociallıq tarmaqlardan paydalanıw keńeyiwi menen qáwipsizlik máseleleri de áhmiyetli bolmaqta. Olardan biri – sanlı zorlıq (cyberbullying).

 Bul – insannıń jeke turmısına, abırayı hám qádir-qımbatına zıyan keltiretuǵın hár qanday onlayn zorlıq túri.

 Sanlı zorlıq – bul internet, sociallıq tarmaqlar, messendjerler, telefon hám basqa elektron qurallar arqalı insandı qorlaw, qorqıtıw yamasa basım ótkeriw bolıp tabıladı.

 Usı múnásibet penen 25-noyabr kúni Qaraqalpaqstan awıl xojalıǵı hám agrotexnologiyalar institutında, Hayal-qızlar máseleleri boyınsha rektor másláhátshısı Z.Mambetniyazova basshılıǵında, “Hayal-qızlarǵa qarsı sanlı zorlıqqa shek qoyıw ushın birleseyik” temasında ushrasıw shólkemlestirdi. Bul ushrasıwǵa, Qaraqalpaqstan Respublikası Joqarı bilimlendiriw ilim hám innovaciyalar ministrliginiń Korupciyaǵa qarsı gúresiw bóliminiń bas qánigesi Q.Yakubov hám usı ministrliktiń yuristi M.Sagindikov, Shańaraq hám Gendr ilimiy izertlew institutı doctorantı N.Primbetova, “Jas awlat” MPJ baslıǵı A.Qudaynazarova hám hayal-qızlar belsendisi M.Qaljanovalar qatnastı. Búgingi ushrasıwda student jaslarımızǵa kelgen miymanlar tárepinen Sanlı zorlıqqa shek qoyıw máselesinde bir qansha túsinikler berildi hám usı baǵdarda tayarlanǵan video rolik arqalı bunday zorlıqqa shek qoyıw máselesi dodalandı.