Prezident múrájatnaması – elimizdi rawajlandırıwdıń tiykarǵı baǵdarlaması

Elimizde bir neshe jıllardan beri jańa jıldıń baslanıwı aldınan Húrmеtli Prеzidеntimizdiń Оliy Mаjlis hám Ózbеkstаn хаlqınа Múrájаt jollawı dástúrge aylanǵan.

 Bul jılǵı múrájаtnamadа da, hár bir tаrаwdıń аldınа rеspublikаmızdı rawajlandırıw, хаlıqtıń turmısı аbаdаnlıǵın jaqsılaw baǵdarlarında еń tiykаrǵı wаzıypаlаr anıq bеlgilеp bеrildi.

Múrájatnama – insan qádiri hám erkinliklerin qádirlew, keleshek áwlad ushın sıpatlı tálimdi engiziw, korrupciyasız jámiyetti jaratıw, isbilermenlikti jańa basqıshqa kóteriw, sociallıq qorǵawdı kúsheytiw, ekologiya, global mashqalalardı sheshiw hám xalqımız arasında milliy tatıwlıq, diniy bawırıkeńlikti támiyinlewge qaratılǵan baǵdarlama boldı.

Prezidentimiz óziniń sózinde «tálim sıpatın asırıw – Jańa ózbekstandı rawajlandırıwdıń birden-bir tuwrı jolı» ekenligin atap ótip, bunda tálimniń barlıq basqıshlarına tiyisli tiykarǵı wazıypalardı belgilep berdi. Sebebi, tálim tarawı rawajlanbay turıp hár qanday jámiyettiń basqa tarawlarınıń aldıǵa ilgerilewin kóz aldımızǵa keltiriw qıyın.

Prezidentimiz óziniń múrájatında joqarǵı bilimlendiriw tarawında ámelge asırılıp atırǵan jumıslarǵa toqtalıp ótip, keyingı jıllarda joqarı oqıw orınları sanı 2,5 esege kóbeyip 198 ge jetkenligin, jaslardı joqarı bilimlendiriw menen qamrap alıw dárejesi 9  % ten 38 % ke kóbeygenligin aytıp ótti. Sonıń menen birge, jaslardıń oqıp bilim alıwı ushın qolaylıqlar jaratıw maqsetinde joqarı oqıw orınları studentleri ushın jeńilletilgen tálim kreditlerine resurslar eki esege kóbeytilip 1,7 trillion sum, ilim-pán hám innovaciyalarǵa 1,8 trillion sum qarjı ajıratılıwın, endi alımlarımız suw hám energiyanı tejew, topıraq ónimdarlıǵın asırıw baǵdarında anıq nátiyjeler kórsetiwi kerekligin bildirip ótti.

Joqarıdaǵılardan kelip shıǵıp, Prezident múrájatnaması Jańa ózbekstandı qurıwda qatnasıp atırǵan biz professor-oqıtıwshılar hám student jaslar ushın keleshektegi jumıslarımızda tiykar bolıp xızmet etedi.

Satniyaz Allaniyazov

«Awıl xojalıǵın mexanizaciyalastırıw  hám suw xojalıǵı» fakulteti dekanı, texnika ilimleri kandidatı