Qaraqalpaqstan awıl xojalıǵı hám agrotexnologiyalar institutınıń kishi májilisler zalında Ózbekstan Respublikası Prezidentligine talaban Qodirov Alisher Keldievichtiń saylaw aldı baǵdarlamasın student jaslar arasında úgit-násiyatlaw, sonday-aq, birinshi márte saylawlarǵa qatnasıp atırǵan jaslarǵa saylaw nızamshılıǵı boyınsha túsinikler beriwge baǵıshlanǵan ilaj bolıp ótti.

Oǵan Milliy Tiklanish Demokratik Partiyası Qaraqalpaqstan Respublikası Keńesi Atqarıwshı komiteti bólimi baslıǵı, Qaraqalpaqstan Respublikasına miyneti sińgen yurist, yuridika ilimleri kandidatı X.Qabulov, Ózbekstan Milliy Tiklanish Demokratik partiyası Qaraqalpaqstan Respublikası Keńesi Atqarıwshı komiteti apparatı jetekshi qánigesi Nurbek Esemuratov, partiya belsendileri hám institut student jasları qatnastı.

Ilajdı «Jaslar menen islesiw, ruwhıylıq hám aǵartıwshılıq» bólmii baslıǵı M.Tlegenov ashtı hám basqarıp bardı.

Ilájda qatnasqan miymanlar tárepinen Ózbekstan Respublikası Prezidentligine talaban Qodirov Alisher Keldievichtiń saylaw aldı baǵdarlamasınıń mazmun-mánisi hám onda alǵa qoyılǵan maqset hám wazıypalar jóninde keń túsinik berildi hám jaslardıń ózlerin qızıqtırǵan sorawlarına juwaplar berdi.

Óz gezeginde student jaslar da ilajdan alǵan tásirleri hám Prezident saylawına belsene qatnasıw  boyınsha óz pikir- usınısların bildirdi.