Náshebentlik hám AIJS keselligine qarsı gúreseyik

Qaraqalpaqstan awıl xojalıǵı hám agrotexnologiyalar institutında  «Jaslar arasındaǵı náshebentlik zatlardıń tarqalıwına qarsı gúresiw» atamasında ushırasıw bolıp ótti. Ushırasıwdı Jaslar  máseleleri hám  ruwxıy-aǵartıwshılıq isleri  boyınsha prorektor N.Absattarov ashtı hám alıp bardı. Ol óz sózinde náshebentliktiń awır aqıbetleri, sonday-aq, respublikamız aymaǵında jinayatshılıqtıń aldın alıw maqsetinde alıp barılıp atırǵan is-ilajları, respublikamız aymaǵında hár jılı fevral ayında ótkeriletuǵın profilaktika nátiyjeleri haqqında keń túrde maǵlıwmatlar berdi.Soń Ózbekstan Respublikası Ishki isler ministrligi jınayat qıdırıӯ  bas basqarması bólim baslıǵı A.Matlyubov, Qaraqalpaqstan Respublikası   Ishki isler ministrligi jınayat qıdırıӯ basqarması xızmetkeri F.Azgarov, Qaraqalpaqstan Respublikası Narkologiya dispanseri shıpakeri M.Eshmuratov,Nókis qalası Allaxberdi Aziz Jome meshiti imamı  A.Xojasov hám Qaraqalpaqstan Respublikası AIJSǵa qarsı gúresiw orayı shıpakeri G.Qayıpovalar sózge shıǵıp jaslar arasında náshebentliktiń aldın alıw ham oǵan qarsı gúresiw hám de AIJS keselliginiń awır aqıbetleri boyınsha júrgizilip atırǵan úgit-násiyat islerine toqtap ótti. Sonday-aq, ayırım jaslarımızdıń narkotik zatlar menen baylanıslı jınayatlardı islewi hám náshebentlik jolına kirip baratırǵanlıǵı hakqında toqtalıp, joqarıda keltirip ótilgen unamsız illetlerge qarsı bárshe jaslar menen birgelikte gúresiw kerekligi aytıp ótildi. Ushırasıw juwmaǵında institut tyutorları hám de ZOOM platforması arqalı qatnasqan studentler ózleriniń qızıqtırǵan sorawlarına juwaplar aldı.