RAWAJLANÍWDÍŃ TIYKARÍ –SAPALÍ BILIMLENDIRIW

Prezidentimiz Shavkat Mirziyoev  2023 jılǵa mámleketimizde “Insanǵa itibar hám sapalı bilimlendiriw jılı” dep atama beriwi elimizde hár bir insan dıqqattan shette qalmaytuǵınlıǵın, olardıń mashqalaların úyreniwge qaratılatuǵınlıǵın, búgingi kúnde elimizdiń rawajlanıwında mektepke shekemgi mekemeleri, mektep, kásip-óner mektebi, kolledj hám texnikumlar, joqarı oqıw orınlarında sapalı bilim beriwdiń nátiyjeliligin asırıwda ayrıqsha orın tutadı.

Sebebi, elimizde jasap atırǵan hár bir insannıń tınısh, baxıtlı turmıs keshiriwi, onıń salamatlıǵın bekkemlewde, jaqsı bilim alıwında, shańaraǵınıń turmıs jaǵdayın jaqsılawda bir qansha imkaniyatlar, háreketler ámelge asırılıp kelinbekte.

Sonday-aq. Prezidentimiz óz sózinde Bilimlendiriw sapasın asırıw – Jańa Ózbekstan rawajlanıwınıń birden-bir jolı ekenligin aytıp ótti.

Respublikamızda alıp barılıp atırǵan mámleket siyasatınıń orayında insan hám onıń máplerin támiyinlewde tiykarǵı wazıypa etip belgilengen. Bul siyasat hámiyshe dawam etetuǵınlıǵın bildirdi.

Prezident óz múrájáátinde 2023 jıldaǵı eń tiykarǵı baǵdarlardan biri Joqarı oqıw orınlarına ayrıqsha toqtap ótti. Elimizde joqarı oqıw orınları 2,5 esege kóbeyip, 198 ge jetti, studentlerdi joqarı oqıw orınlarına qamraw 9 procentten 38 procentke astı.

Múrájáátnamanıń tiykarǵı bayanatları “bilimlendiriw”, “mektep”, “xalıq”, “isbilermenlik”, “konstituciya”, “máhálle” hám energetika sózleri boldı. Sonıń menen birge alımlarımız aldında suw hám energiyanı únemlew, topıraq ónimdarlıǵı hám zúráátlilik, geologiya, sanaat, qurılıs tarawlarında nátiyjeler kórsetiliw kerekligin aytıp ótti.

Haqıyqatında hám san kóbeygen menen sapa bolmasa, erteńgi pitkeriwshilerimiz jumıs penen támiyinlewde mashqalalar júzege keledi. Joqarı oqıw orınlarında sapalı bilimlendiriwdi jolǵa qoyıwda, professor-oqıtıwshılardıń ilimiy jetiskenliklerin asırıw, óndiris penen integraciyanı jolǵa qoyıw, zamanagóy oqıwlıqlar jaratıw, shet el joqarı oqıw orınları menen baylanısta bolıw talap etiledi.

Jańa Ózbekstan ushın bilimlendiriw tarawın rawajlandırıwda Qaraqalpaqstan awıl xojalıǵı hám agrotexnologiyalar institutı professor-oqıtıwshıları jaslarǵa sapalı bilim beriwde, «bilim, ilim, óndiris» uranı tiykarında ayanbay miynet etetuǵınlıǵına tolıq isenemen.

Rısnazar Yusupov

Miywe-sabzavotshılıq, awıl xojalıǵı ónimlerin saqlaw hám qayta islew texnologiyası fakulteti dekanı