Házirgi kúnde joqarı bilimlerdiriw tarawında bilimlendiriw sapasın asırıwda shet ellerdiń joqarı oqıw orınları menen birge islesiw, tájriybe almasıw, xalıq aralıq baylanıslardı bekkemlew máselelerine ayrıqsha itibar qaratıw talap etiledi.

 Bul baǵdarda Qaraqalpaqstan awıl xojalıǵı hám agrotexnologiyalar insitutı Rossiyanıń bir qatar joqarı oqıw orınları menen shártnamalar dúzip, baylanıslar ornatılıp kelinbekte.

Bul xalıq aralıq baylanıslardı jánede bekkemlew hámde agrar tarawda Rossiya Federaciyasınıń joqarı bilimlendiriw tarawındaǵı tájriybesinen paydalanıw maqsetinde  institutımızdıń Qubla-Ural mámleketlik agrar universiteti menen birge islesiw jolga qoyılmaqta.

Institumızda usı universitet rektorı S.V.Cherepuxina hám prorektorı S.A.Chichilanova  hám institutimiz rektorı E.Tóreniyazov, oqıw isleri boyınsha prorektor N.Absattarov, ilimiy isler hám innovaciyalar boyınsha prorektor B.Jollıbekov hám fakultet dekanları qatnasıwında ushırasıw ótkerildi.

Onda bilimlendiriw tarawında birge islesiwdi ornatıw, tarawdıń rawajlanıwı, sonday-aq, erteńgi kúnniń jetik qániygelerin jetistiriwde ámelge asırılatuǵın ilajlar haqqında pikirlesiw alıp barıldı hám wazıypalar belgilep alındı.

 Ushırasıw juwmaǵında birge islesiw boyınsha eki tárep kelisim bildirdi hám shártnamalar dúzildi.

Maǵlıwmat ushın aytıp ótetuǵın bolsaq, házirgi kúnde institutımızdıń 3 studenti usı oqıw ornında grant tiykarında magistratura basqıshında tálim almaqta.

Ushırasıwdan soń miymanlar institutımız haqqında keńirek túsinik alıw, oqıw ornında jaratılǵan múmkinshilikler hám erisilgen nátiyjeler menen jaqınnan tanısıw maqsetinde kafedralarda boldı. Dáslep miymanlar instituttıń balıqshılıq kafedrasında bolıp, kafedra laboratoriyasında jetistirilip atırǵan balıq túrleri menen tanıstı, studentlerdiń bilim alıwı ushın jaratılǵan sharayatlar menen tanıstı hám kafedranıń professor-oqıtıwshıları menen erisilgen jetiskenlikler, aldaǵı rejeler haqqında sáwbetlesiw alıp barıldı.

Onnan soń miymanlar institut boylap sayaxattın dawam etip, jipekshilik hám tutshılıq kafedrasına Ózbekstanda jaratılǵan Qıtay, Yaponiya,Evropa mámleketleri, Gruziya, Ázerbayjan hám Rossiyadan keltirilgen tut jipek qurtı kollekciyasınan alıp kelingen reńli jipek qurtlardıń orap baslaw dáwiri menen tanıstı hám student jaslar menen reńli jipek qurtınıń ózgesheligi, olardan ilimiy jumıslarda paydalanıwı, sonday-aq, usı kafedrada ilimiy jumıslar alıp barıp atırǵan Yaponiya awıl xojalıq universiteti professorı Dr.Makoto IIKUBO hám studentler menen sáwbetlesiw alıp barıldı.

Miymanlar bunnan basqada kafedralarındaǵı oqıtıw processi hám laboratoriyalıq jumısları menen tanıstı hám ıssıxanada egilgen egin túrleri menen qızıqsındı. Bul eki oqıw ornı ortasında duzilgen kelisim xalıq aralıq baylanıslardıń janede bekkemleniwi, tarawdıń rawajlanıwı, sonday-aq, jetik hám maman kadrlar jetilisiwine múmkinshilik jaratadı.